CHAPTER 6

HANGGANG ngayon ay hindi pa rin makapaniwala si Alex sa natuklasan na kasarian ni Jc. Walang bakas ng kabaklaan sa katawan, sa hitsura, sa pananamit, sa kilos, at maski sa boses nito magmula nang makilala niya ito. Pero nang dahil sa hindi sinasadyang pangyayari kahapon ay natuklasan niya ang pinakatatago-tago nitong sikreto. Paniguradong walang kamalay-malay si Sir Ronwaldo tungkol sa totoong pagkatao ng kaniyang anak.

Patungo siya ngayon sa eskwelahan ng kaniyang pamangkin para manood ng stage play nito. Naroon na ang kaniyang Ate Celestine at kanilang mga magulang. Hindi alam ng mga ito na day off niya mula sa trabaho. Gusto niyang supresahin si Hayden kaya naman sinadya niya talagang huwag ipaalam ang tungkol sa pagpunta niya.

Malapit na siya sa gate ng eskwelahan nang matanaw niya na lumalabas mula roon ang ilang mga batang estudyante. Bawat bata ay may mga magulang na kasama. Kung hindi siguro magulang, ay baka ate, kuya, tita, tito, ninong, ninang, lolo at lola ng mga bata.

Tarantang kinuha niya mula sa kaniyang shoulder bag ang cellphone at chineck sa calendar kung anong oras ang simula ng stage play ng kaniyang pamangkin. Nanlaki ang mata niya kasabay sa pagbuka ng kaniyang bibig nang malaman niyang dalawang oras na pala siyang late! Alas-otso pala ang simula ng programa pero heto at nakarating siya sa eskwelahan ng pasado alas-diyes.

Nasapo niya ang noo sa nagawang kapalpakan. Kung bakit kasi hindi niya muling inalam ang siguradong oras mula sa kaniyang Ate Celestine. Akala pa naman niya ay magagawa na niyang magtagumpay sa kaniyang plano dahil matagal ng inuungot sa kaniya ni Hayden ang pagbisita niya sa eskwelahan nito. Mula kasi ng magsimula ang pasukan, hindi pa niya naihahatid o nasusundo ang kaniyang pamangkin.

Laglag balikat na naghintay na lang siya mula sa labas. Ililibre na lang niya ito sa Jolibee para hindi magtampo ang bata sa kaniya.

Dahil medyo tirik na ang araw ay naghanap siya ng masisilungan. Sumilong siya sa isang malaking tindahan na malapit mismo sa gate ng school nang may mahagip ang mata niya. Isang bakla na may malaking katawan ang nakaagaw ng kaniyang pansin. Kalalabas lang nito sa tarangkahan ng eskwelahan at may kasama itong batang babae. Napansin din niya ang dalawang lalaki na nakabuntot sa dalawa. Siguro ay bodyguard ang mga iyon. Nakasuot ito ng spaghetti black night dress, black high heels na tantiya niya ay two inches ang taas ng takong, may cutics na kulay pula ang daliri sa paa at kamay. May suot itong shade na siyang humaharang sa mata nito. Pero base sa hugis ng mukha nito at sa tangos ng ilong, malakas ang wifi connection niya na guwapong bakla ito. Siguradong wig din ang suot nito sa ulo dahil sa hindi maayos na pagkakalagay nito. Bongga ang kolorete nito sa katawan dahil sa suot na malaking hikaw, pulseras at kuwintas na binagayan din ng bonggang red lipstick.

Grabe ang muscle nito. Sobrang awkward! Machong bakla!

Gusto niyang matawa sa ayos nito. Napaka-weird naman kasi talaga na makakita ng bakla na katulad niya. Ang macho, ang laki ng muscle, ang ganda ng balikat. Lalaking-lalaki sana ang dating pero bading naman. Sayang ang lahi nito kung hindi man lang malalahian ng katulad niyang mala-diyosa sa kagandahan.

Kung siya ay machong bakla, ikaw naman ay dakilang baklang assumera! saway niya sa kaniyang sarili.

"Tito, you're so galing po kanina! You're the best!" saad ng cute na batang babae na kahawak-kamay nito.

"Really? Are you proud of your Tita Mommy?" Hindi niya maaninag ang mukha nito dahil nakatalikod ito sa kaniya habang ang batang babae ay nakaharap sa direksiyon niya.

Sandaling tumigil ang mga ito sa harapan niya dahil sa may ka-text siguro ang matronang bakla dahil abala ito sa pagdutdot sa cellphone nito habang nakikipag-usap sa bata.

Narinig niya ang mahinhin na pagbungisngis ng batang babae. "Yes! I'm so proud of you, Tita Mommy. If Mommy and Daddy was here, I'm sure they will both clap their hands kasi you are very magaling!" Niyakap siya ng bata na umabot lang hanggang bewang nito.

"Thank you, Viv. So, where do you want us to go?" Tinigil na nito ang pagpindot sa cellphone at nakita niyang hinubad na nito ang suot na shade. Parang na-excite siya na makita ang mukha nito kaya pasimple siyang lumapit sa mga ito.

"Jolibee!" masayang sigaw ng bata na tinawag niyang Viv.

Hindi na siya nahirapan na makita pa ang mukha nito dahil bigla itong umikot paharap sa kaniya. Gayon na lamang ang pagkamangha niya nang tuluyan na niyang makita ang hitsura nito.

"Oh my."

Akala niya ay mahuhuli siya nitong nakatingin pero nilampasan lang siya ng mga ito, kasama ang dalawang bodyguard. Tumungo ang mga ito sa nakaparadang van sa gilid ng kalsada at sumakay na kasama si─ Jc.