CHAPTER SIX

"JULAN!" Naisigaw ni Jercelle ang pangalan ng kaibigan ng makita niya itong umaakyat sa bakod. Napatakbo siya palapit dito. "What are you doing there?"

"J-Jercelle..!"

Kitang-kita niya ang pamumula ng mukha nito. Nasapo niya ang sariling dibdib. Muntik na siyang mapatawa. Alam niyang nahiya ito at nagliwanag ang isip sa ginawang kalokohan.

"Jercelle, I'm sorry..."

Bumaba ito sa bakod at napakamot sa ulo.

"Are you out of your mind, Julan? My God! Nabigla talaga ako nang makita kang..?"

"Open the gate, please." Pinagsalikop nito ang dalawang kamay sa tapat ng dibdib. "I just want to be with you and your daughter today..."

"Pero hindi mo kailangang umakyat pa ng bakod." Binuksan niya ang gate. Natatawa siyang umiling. "Hindi ko ma-imagine na ang department manager ng production sa ating company ay gumawa ng ganyang bagay!"

Muli na namang namula ang mukha ni Julan. Pero lalo pa itong gumuwapo sa paningin niya. Nag-mukhang tisoy ang loko.

"Si yaya Sally." Halata sa tinig nito ang pagkainis. "Imbes na pagbuksan ako ng gate ay bumalik pa sa loob ng bahay. Bakit?"

"Come-in, Julan."

Mabilis itong pumasok sa bakuran at malalaki ang mga hakbang sa pagpunta sa main door ng bahay niya. Nataranta naman siyang mabilis itong sinundan.

"Bakit ayaw akong papasukin dito ng yaya mo?" Pikong sabi ni Julan nang banggitin niya ang pangalan nito. "Ano bang meron sa loob?"

"Bumalik lang si yaya Sally dahil sinabi niyang dumating ka..."

"Hindi!" Malakas ang boses na sabi nito. Tuluyan itong nakapasok sa kanyang bahay. "Sinasabi ko na nga ba!"

GUSTONG sumabog ng ulo ni Julan ng pagkapasok niya sa bahay ni Jercelle ay nakitang yakap ni Bricko si Rexcelle habang nakaupo sa sofa.

"Bitiwan mo si Rexcelle!" Sigaw niyang nagtatakbo palapit kay Bricko. Kinuha niya mula rito ang bata. "You have no right to hug her! Baka kung anong gawin mo dito sa bata!"

"Tito Julan, bitiwan mo po ako..."

"Rexcelle, huwag kang lalapit sa taong 'yan!"

"Ano 'to?" Natatawang tanong ni Bricko. Tumayo ito. "Okay ka lang, 'Tol?"

"Julan, akin na si Rexcelle. Kumalma ka nga."

Nilingon niya si Jercelle nang kunin nito sa kanya ang anak.

"Jercelle, bakit nagtitiwala ka sa lalaking 'yan? You don't know him!"

"Mabuting tao si Bricko, Julan!"

"Paano mo nasabi? Jercelle, kakikilala mo lang sa Mokong na 'yan!"

"Bricko ang pangalan ko. Hindi Mokong!" Dinuro siya nito. "Sumusobra ka na!"

"Julan, please! Huminahon ka nga. Huwag kang magsalita ng kung anu-ano!"

"Wow! Ako pa ba ang masama, Jercelle? Nagmamalasakit ako sa inyong mag-ina. I want to protect you in this man!"

"Huwag ka ngang judgmental! Sobra kang makapanghusga. Hindi mo ako kilala."

"Iyon na nga, e. Hindi ka namin kilala. At ewan ko kay Jercelle kung bakit agad na nagtiwala sa 'yo."

"Julan," Hinawakan siya ni Jercelle sa braso. "Bricko is a good man. I trust him."

"Hinayaan mong yakap-yakapin niya si Rexcelle, e, hindi mo sure kung wala nga siyang malisya!"

Napasigaw si Jercelle ng suntukin siya ni Bricko sa mukha. Napaigik naman siya ng maramdaman ang sakit na dulot niyon.

"Marumi ang utak mo!" Sigaw ni Bricko na dinuro siya. "Hindi ako kasing-sama ng nasa utak mo."

Muling napasigaw si Jercelle ng siya naman ang gumanti ng sundok, na tumama din sa mukha ng lalaki.

"Huwag po kayo suntukan..." Umiiyak na sabi Rexcelle. "Huwag po kayo away..."

"Anak!" Umupo si Jercelle at niyakap ang anak. "Don't cry, Rexcelle. Don't mind them, anak."

Para siyang binuhusan ng malamig na tubig. Napawi ang galit na naghuhumiyaw sa dibdib niya. Agad siyang naawa sa bata.

"Rexcelle, I'm sorry." Sabi niyang umupo din at hinagod ang likod nito. "Huwag kang umiyak. Stop crying..."

Nagtiim-bagang si Jercelle at galit siyang tinitigan. Daig pa niyon ang piniga ang puso niya. Makirot. Hindi niya gustong magalit ito sa kanya.

"Nagpunta ka rito para manggulo, Julan? Tinakot mo ang anak ko. Nagpakita ka ng ganyang attitude kaya umiyak siya ngayon."

"Jercelle, sorry. Pasens'ya na."

"Umalis ka na."

"Pero--"

"Go!"

"Jercelle--"

Hindi na natuloy ang sasabihin ni Bricko dahil sinigawan na rin ito ni Jercelle at pinaalis.

"Sorry. Uuwi na muna ako." Hindi siya tiningnan ni Bricko nang umalis ito.

Nang magkatinginan sila ni Jercelle ay inulit ang pagpapaalis sa kanya. Ayaw sana niya dahil gusto pa niyang humingi ng tawad pero tumayo ito at binuhat ang anak. Saka iniwan siya at pumasok sa kuwarto. 

"Jercelle..."

NANG makita ni Bricko si Julan na lumabas ng unahang pinto ng bahay ni Jercelle ay itinapon niya ang hinihithit na stick ng sigarilyo. Mula sa pagkakasandal niya sa taxi ay sinalubong ito sa paglabas ng gate.

"Huwag kang gago, ha!" Sabi niyang dinuro ito. "Huwag mo akong pag-isipan ng masama!"

Tinapik ni Julan ang kamay niyang nakaduro dito.

"Bakit? Sino ka ba?"

"Iyon na nga, e. Hindi mo ako kilala at wala kang alam sa totoo."

"Kung may masama kang binabalak sa mag-ina, tumigil ka! Ako ang kalaban mo."

Pagak siyang tumawa. "Talagang ang sama ng turing mo sa akin, Mokong ka. Wala akong masamang binabalak sa mag-ina. Malinis ang hangarin ko kay Jercelle!"

"Talaga lang! Sinabi ko na nga ba't plano mong ligawan si Jercelle, e. Hoy, Bricko! Hindi ako ang Mokong, ikaw 'yon. Huwag mong itawag sa akin ang tawag ko sa 'yo."

"Nagseselos ka, ano? Nagkakaganyan ka dahil hindi mo matanggap na malapit na ako sa mag-ina."

"Iyon nga ang hindi ko matanggap... ang agad na pagtitiwala sa 'yo ni Jercelle. Imagine, yakap-yakap mo si Rexcelle. Pasikat ka! Ipinakikita mo sa mommy niya na tanggap mo kunwari na anak 'yong bata kahit hindi mo kadugo!"

Tumawa siya ng mahina habang umiiling. Walang kaalam-alam si Julan kung ano ang sinasabi. Halatang selos na selos ito kaya nagmumukhang tanga.

"Lalo ka na, Mokong... kapag nalaman mo ang katotohanan."

"Sinabi ko sa 'yong ikaw ang Mokong at hindi ako, Bricko!"

"Bahala ka sa buhay mo! Pero sinasabi ko sa 'yo, Julan... seryoso ako kay Jercelle at hindi mo ako mapipigilan sa panliligaw sa kanya."

Tinalikuran niya ito at dali-dali na siyang sumakay sa taxi niya. Iniwan niya ito, na tila tulala sa kinatatayuan.

"Sorry ka na lang, Julan." Sabi niya sa sarili. "Alam kong mahal mo si Jercelle higit sa pagiging kaibigan. Ganoon din ang turing niya sa 'yo kaya mahihirapan kang ihayag ang totoo mong damdamin. Gagawin ko ang the best ko para makuha ang attention niya alang-alang kay Rexcelle!"